KALIBO, Aklan—Tatlong negosyante ro nagdangop sa Bombo Radyo Kalibo matapos nga makabakae it masobra sa 20 nga reams it peke nga sigarilyo sa banwa it Kalibo.
Suno kay alyas Nene, sambilog sa mga biktima nga kapin sa 20 nga reams ro anang ginbakae nga nagabalor tanan it masobra sa 15,000 pesos.
Ro orihinal nga presyo sigon it kada ream hay 872 pesos, apang ro sumbil kanda it mga suspek hay 758 pesos ag may mga freebies pa rason nga insigida nanda nga gin-bakae.
Matapos magreklamo ro andang mga customer nga owa it lasa ro nabakae nga sigarilyo, dikara eon sanda nagduda nga peke nga sigarilyo ro ginsumbil kanda.
Bangud kara, insigida sanda nga nagsugid sa Bombo Radyo Kalibo nga gin-report man dayun sa Kalibo Municipal Police Station.
Sa pagkumpara sa packaging, code ag selyo it sigarilyo, mas makutom ro kulay it original kaysa sa peke.
Nagakabaeaka man si alyas Nene bangud nga ginasukot imaw it anang ginboe-an it kwarta.
Sa makaron ro insidente hay padayun nga gina imbestigahan it mga otoridad partikular ro identity it mga suspek nga ginasugid nga puro Ilonggo speaking ag kon sin-o ro andang supplier.
Nagtau man sanda it paandam sa iba pang mga negosyante agud nga indi mabiktima it mga manugloko nga dealer it peke nga sigarilyo.
Kasong pageabag sa Intellectual Property Code of the Philippines ro posibleng paga-atubangon it mga suspek.
