KALIBO, Aklan—Naga-abot sa masobra sa 8.5 milyon pesos ro kantidad it kahalitan nga gin-aywan it maeapnagon nga pagbaha tuga it low pressure area ukon LPA ag Inter-Tropical Convergence Zone ukon ITCZ ko sabado nga adlaw sa bilog nga probinsiya it Aklan.
Raya hay base sa ginpaguwa nga Partial Damage Assessment Report it lokal nga probinsiya it Aklan.
Suno kay Galo Ibardolasa, action man it Provincial Disaster Risk Reduction and Management Council ukon PDRRMC nga raya hay halin pa eamang sa ap-at nga banwa nga nagsumite it andang report nga may petsang Oktubre 25, 2021.
Sa banwa it Numancia, kapin sa 230 nga pamilya ro nag-evacuate ukon katumbas it 675 nga katawo samtang ro apektadong pamilya hay may kabilugan nga 11,720 ukon 35,693 nga katawo.
Nakalista man sanda it 13 nga ka partially damaged nga mga panimaeay.
Sa sektor man it agrikultura, ginatantya nga 186.95 nga ektarya ro naapektuhan ukon may danyos nga masobra sa 1.5 milyon pesos.
Sa livestock ukon mga kasapatan, ro andang kahalitan hay nailista sa 1.2 milyon pesos samtang sa fisheries, ro danyos hay nag abot sa masobra sa 4.2 milyon pesos.
Sa pihak nga parte sa banwa it Tangalan, nakalista 46 nga pamilyang apektado ukon 142 nga katawo.
Ro nag evacuate nga pamilya hay naga abot man sa 42 nga pamilya ukon katumbas it 157 nga katawo nga temporaryong nagsaylo sa mga kaeapitbaeay ukon igbata nga gintaw-an it nagakaigo nga bulig it MSWDO it Tangalan.
Owa pa ro tangalan it may ginpaguwa nga damages sa andang pananum, kasapatan ag sa pagpangisda.
Sa banwa it Lezo, ro kahalitan sa pananum eabi eon sa tanum nga paeay hay naga abot sa 1.7 milyon pesos.
Haeos partial report pa eamang ro ginpasa it banwa it Makato nga sambilog sa mga eubus nga naapektuhan it pagbaha.
Nasayuran nga ginaduso makaron it LGU-Makato nga ipaidaeum sa State of Calamity ro andang banwa bangud sa grabeng kahalitan nga gintuga partiklar sa andang agrikultura ag fisheries.
Samtang, nagapati man si ibardolasa nga posibleng bangud sa baradong draigange system rason it pagtaas it tubi-baha.
