KALIBO, Aklan—Naging maayos ro vaccination roll-out it lokal nga gobyerno it Kalibo matapos nga ginpasugtan ro ”walk in” para sa mga gusto nga magpabakuna.
Suno kay Dr. Jocelyn Garcia it Municipal Health Office ukon MHO-Kalibo nga hugut nanda nga ginapatuman ro health and safety protocol sa andang vaccination site sa covered court it Kalibo Pastrana Park.
Kapin sa 200 hasta 300 sigon nga walk in clients ro nag-avail kara.
Ginataw-an sigon nanda it prayoridad ro mga nagatrabaho sa banwa it Kalibo maskin nga residente it ibang banwa.
Mag-eowas sa pagtaeana it mga walk-in slots, bukas man sanda sa tanan nga mga residente nga naga-edad it 18 anyos pataas maskin nga bukon it kaibahan sa A1 hasta A4 priority sector.
Kinahangean eamang sigon nga magdaea it ID, apang pwede man ro birth certificate ukon barangay ID nga makapamatuod it andang identification.
Ginpadumdum man ni Dr. Garcia nga, first come, first served basis gihapon ro andang ginapatuman nga sistema.
Sa pihak nga parte, naga abot pa eamang sa 30,572 doses it bakuna ro andang na-administer ag kapin sa 13,500 nga ka indibidwal ro fully vaccinated sa banwa it Kalibo.
