KALIBO, Aklan—Natapos eon it Municipal Planning Development Office (MPDO) nga mai-turnover ro kapin sa 400 ka mga housing unit sa bahin it Brgy. Briones, Kalibo.
Suno kay Municipal Planning Coordinator Engr. Marlo Villanueva nga madinaeag-on nanda nga nai-award kahapon ro 94 nga nabilin nga unit sa mga natungdan nga housing recipient.
Ginsaksihan sigon raya it mga representante halin sa National Housing Authority (NHA) ag iba pang natungdan nga ahensya it gobyerno.
Kaparte it programa ro pagtao it mga yabe ag pilang dokumento sa mga kwalipikadong benepisyaryo it pabaeay halin sa gobyerno.
Kadungan kara, nagpromisa man sigon ro mga housing recipient nga paga-isataran nanda ro andang unit ag paga-aywan eon ro andang dating gina-istaran.
Ginpasiguro man ni Engr. Villanueva nga paga-siguraduhon nanda nga magasunod ro mga benepisyaro sa mga polisiya it gobyerno.
Matueopangdan nga ro pabaeay hay kaparte it programa it gobyerno para sa mga pamilya nga grabeng naapektuhan it pagpanaeasa it bagyong Yolanda ko dag-on 2013.
