KALIBO, Aklan—Ginkumpirma ni Punong barangay Niel Candelario it Poblacion, Kalibo nga nakabaton sanda it reklamo halin sa sangka pumueuyu nga gina-alegar nga ginkumos ro andang gin-isyu nga barangay certificate nga pagagamiton kunta bilang requirements sa voter registration.
Sa interview it Bombo Radyo Kalibo, ginpahayag ni Kapitan Candelario nga nagpatigayon sigon sanda it pag-usisa ag natukiban nga bukon sigon it taga Municipal Comelec Office ro naghimo kara kundi nga gina-alegar nga taga-munisipyo it Kalibo nga sangka job order employee.
Ginpahayag dugang nga sanda ro naga-screen it mga requirements it mga botante kon pwede sanda nga maka-deretso sa sueod it opisina it comelec agud nga makapa-rehistro.
Kaabuan sigon sa mga kliyante hay mga gustong mag-tranfer it andang voters registration records.
Angot kara, ginklaru ni Cripsin Raymund Gerardo, tagapaghambae it Comelec-Aklan nga owa eon ginabaton ro barangay certification ukon barangay ID bilang requirements sa pagpa-rehistro.
Aminado man imaw nga ro komisyon mismo ro naghinyu sa LGU kalibo nga mabutangan it tawo ro pila agud nga mapatuman ro health and safety protocol partikular ro physical distancing.
Mabahoe man ro pagpati ni Gerardo nga nakaangkon eamang it owa pagka-ilintindihan ro magtimbang nga parte.
