KALIBO, Aklan—Ginpaidaeum eon sa state of calamity ro bilog nga banwa it Makato bangud sa grabeng pagbaha tuga it mabaskog nga pag-uean nga daea it Low Pressure Area ag Inter-Tropical Convergence Zone umpisa ko nagtaliwan nga domingo.
Tuyo kara nga mataw-an it kahigayunan ro mga residente nga makabangon halin sa epekto it flashfloods sa andang pamilya ag pangabuhian.
Pinaagi sa pagpaidaeum sa nasambit nga banwa sa state of calamity hay pwedeng magamit ro andang calamity funds agud nga mabuligan ro mga apektadong residente sa lugar.
Sa pagtantiya it Municipal Disaster Risk Reduction Management Office (MDRRMO), kapin sa P5-milyon pesos ro kantidad it kahalitan sa imprastraktura samtang P127 milyon pesos man sa agrikultura ag fishery sector.
Masobra sa 3,000 man nga mga residente ro apektado it kalamidad.
