KALIBO, Aklan—Ginaduso makaron it Chairman it Committee on Transporation nga si Kalibo Sangguniang Bayan member Matt Aaron Guzman nga makaangkon it kaugalingon nga Animal Bite Treatment Center ro banwa it Kalibo.
Tuyo sigon kara nga mabuligan ro mga indigent nga Kalibonhon nga mataw-an it libreng anti-rabies vaccine.
Natueopangdan sigon ni Guzman nga may kamahaean ro presyo it bakuna kontra sa rabies rason nga naisipan kara nga iduso ro nasambit nga proposisyon.
Mabahoe nga bulig suno kana ro pasilidad sa oras it emerhensiya eabi pa kun maangkit it may rabies nga sapat kapareho it kuring ag ayam ro sangka tawo.
Target sigon nanda nga magtaeanaa it espasyo sa bahin it RHU-3 para sa rayang proyekto.
Mag-eowas kara, ginakinahang-ean man it well-trained personnel nga magadumaea.
Positibo si Guzman nga masarangan nanda nga matapos raya makaron nga dag-on para maeakip sa pondo para sa 2022.
