KALIBO, Aklan—Nagapabilin nga paealigban sa pamilya Colas ro natabo sa andang sang buean ag ap-at nga adlaw nga eapsag nga babaye matapos rayang bawian it kabuhi sa indi pa matumod nga rason ko Nobyembre 12.
Suno sa ama it eapsag nga si Pawie Colas, residente it banwa it Kalibo, bandang alas-11:48 it gabi-i it Huwebes hay nagdede pa ro baby sa anang live-in partner.
Apang, kat mabugtawan sigon imaw it mga pasado alas-2:00 it aga-aga hay napan-uhan eon lang kara nga may gaob eon sa ilong ag dughan ro andang unga.
Ro gaob sigon sa ilong it baby hay may marka pa it tudlo nga mingko ginpislit samtang ro nakita nga gaob sa dughan hay pabilog nga medyo inangkitan.
Owa man it nakita nga nina ukon dugo sa eawas it eapsag apang makataliwan ro masobra sang oras hay nagkalhit eon sa iba pang parte it anang eawas ro mga gaob.
Kat anang usisaon ro kahimtangan it unga hay owa eon raya it pulso ag owa eon man nagaginhawa.
Owa eon sigon nanda gindaea sa ospital ro eapsag bangud maeamig eon raya ag owa eon it ginhawa.
Dugang pa ni Pawie nga bukon man it masasa ag healthy man ro andang baby rason nga nakibot sanda sa hitabo.
Eubos man ro pagkanugon nanda it anang 15-anyos nga live-in partner sa pagkamatay it andang unang baby.
Sa maabot nga adlaw it Lunes nakataeana nga i-eubong ro nasambit nga baby girl.
