KALIBO, Aklan—Naglunsar it raffle ro lokal nga gobyerno it Nabas agud nga maengganyo ro mga residente nga magpabakuna eabi eon sa paeaabuton nga 3-day vaccination drive sa bilog nga nasyon umpisa sa Nobyembre 29, 30 ag Disyembre 1.
Suno kay Nabas mayor James Solanoy nga tuyo kara nga magtaas ro andang turn-out matapos nga sambilog sanda sa mga banwa sa aklan kaibahan ro libacao nga kulelat sa numero it mga nabakunahan nga eligible population.
Aminado ro alkalde nga medyu mabudlay ro pagsueong it andang bakunahan rason nga mas pang ginpabaskog ro andang vaccination awareness campaign.
Nagpaguwa man sanda it anunsyo nga posibleng iga-require eon ro vaccination card ukon certificate sa pag-apply it trabaho partkular sa isla it Boracay.
Nagapati imaw nga obligasyon it pumueuyu ro magpabakuna bilang proteksyon kontra sa deadly virus rason nga samtang libre pa hay dapat sigon nga kalitan ro kahigayunan.
Bilang bulig, nagtaeana sigon sanda it mga saeakyan para sa mga gustong magpabakuna nga halin sa mga maeayo nga barangay.
Base sa record, ginpahayag ni mayor solanoy nga haeos 11,000 pa eamang ro nagpabakuna nga mga residente ukon haeos owa pa it katunga sa andang target nga populasyon.
Nag apela man imaw nga indi maging brand conscious.
