KALIBO, Aklan—Pormal eon nga ginpagguwa it Commission on Elections (Comelec) ro ginakabig nga “new normal” campaign guidelines sa atubang it COVID-19 pandemic.
Suno kay Crispin Raymund Gerardo, tagapaghambae it Comelec-Aklan, ginapasugtan eon ro in-person activities para sa political campaign it mga kandidato sa 2022 national and local elections.
Sa idaeom it Comelec Resolution No. 10732 nakabaehag ro mga patakaran para sa in-person campaigning; pagpatigayun it political meetings, caucuses, conventions, rallies ag miting de avance, motorcades ag caravans.
Para sa in-person campaign, magkaiba ro polisiya depende sa alert level classification it kada lugar.
Angot kara, kinahang-ean gihapon nga masunod ro health and safety protocols rason nga hugut nga ginabawaean ro pakikipag-handshake, paghakos ag iba pang physical contact; pati eon ro pagpanao it pagkaon, ilimnon ag anumang goods ag items.
Nagapati man ro komisyon nga kinamatarong it mga pumueoyo nga makilaea it personal ro kada nagapadaeagan nga pulitiko.
Ro mga makaibahan it kandidato sa in-person campaigning hay kinahang-ean nga may maipakita sa Comelec Campaign Committee (CCC) nga proof of identity, pati eon man ro detalye it andang mga aktibidad.
Tanan nga mga pagpangampanya hay kinahang-ean nga may una nga permit halin sa Comelec Campaign Committee.
Ro komite hay ginataw-an it 48 oras para asikasuhon ro mga nasambit nga aplikasyon.
Anumang pag-eabag sa polisiya hay makabig nga election offense nga may kaakibat nga penalidad nga sang dag-on hasta an-om nga dag-on nga pagkakulong.
