KALIBO, Aklan—Target it lokal nga gobyerno it Banga nga mabakunahan ro haeos 1,000 nga indibidwal umpisa makaron nga adlaw hasta sa Disyembre 1.
Raya hay sa pag-arangkada it 3-day National Vaccination Day it gobyerno.
Suno kay Donnalyn Siyambio, tagapaghambae it Banga Inter-Agency Task Force nga prayoridad nanda ro tanan nga mga owa pa nabakunahang adult population ukon naga-edad it 18 anyos pataas.
Agud nga maabot ro nasambit nga numero ag ma-maximize ro tatlong adlaw nga vaccination nga gintaeana it national government, nagabaton sanda it walk-in sa andang vaccination site ag nag-alokar sa kada barangay nga makatipon it 40 nga pagabakunahan.
Sa Disyembre 1 suno kana hay magapatigayon sanda it bakunahan sa Linabuan sur, banga nga pagapangunahan it department of health , kun sa siin prayoridad kara ro kapin sa 400 nga mga menor de edad ukon mga naga-edad it 12 hasta 17 anyos nga nagpa-rehistro kamana man ro 18 anyos pataas.
Sa Disyembre 2 hay may schedule man sigon sanda nga ro venue hay sa Daja Sur, Daja Norte ag Tinapuay, Banga.
Samtang, ko nagtaliwan nga domingo hay gin umpisahan man nanda ro pagbakuna sa pediatric population.
Haeos 47% eon sigon it andang eligible residents ro nabakunahann halin sa masobra sa 28,000 nga target nga pumueuyu.
Sa pihak nga parte, gindugang pa ni siyambio nga naga-release man sanda it vaccination certificate sa mga bakunadong nagakinahangean kara.
