KALIBO, Aklan—Nakalista it daywang ka mga kaso it COVID-19 Omicron variant ro nasyon nga Australia.
Suno kay Bombo International Correspondent Denmark Suede it Sydney, Australia nga ro nailistang kaso hay maghalin sa mga pasaherong nagpadueong sa nasambitan nga nasyon maghalin sa Doha, Qatar.
Nasayuran nga nag-eapnaag eun sa bilog nga kalibutan ro ginasugid nga mas makataeapon nga omicron variant.
May una eun nga kapin sa 13 ka mga kaso ro nailista nga maghalin sa nasyon nga Netherlands, ag tig-daywa sa Denmark ag Austria.
Raya hay apisar nga maabong mga nasyon eun ro nagpatuman it mga travel restrictions kontra sa mga travelers maghalin sa mga nasyon nga may presensya it bag-ong variant.
Madumduman nga ro pagkadiskubre sa Omicron, nga gintawag nga “variant of concern” ko nagtaliwan nga dominggo it World Health Organization hay nagtao it kabaeaka sa bilog nga kalibutan bangud masarangan sigon karang sok-ean ro mga bakuna ag pahabaon pa it haeos daywang dag-on ro pandemya it COVID-19.
Nauna rayang natukiban sa South Africa, ag makarun hay natumod eun sa Britain, Germany, Italy, Netherlands, Denmark, Belgium, Botswana, Israel, Australia, ag Hong Kong.
