KALIBO, Aklan—Ginklaro it pamunuan it Federation of Kalibo Tricycle Operators and Drivers Association Inc. ukon FOKTODAI nga nagapabilin sa ap-at nga pasahero ro andang ginasakay sa mga nagabiyaheng tricyle sa kabarangayan it Kalibo.
Raya hay sa pihak it ginpagguwa nga direktiba it Land Transportation Office (LTO)-Aklan ko nagtaliwan nga adlaw it dominggo kung siin ginapabalik eon sa dating presyo ro mga pamasahe sa pampublikong saeakyan umpisa Nobyembre 29 kamana man nga ginapasugtan eon ro 100 percent seating capacity.
Suno kay FOKTODAI president Johnny Damian nga owa nana raya direktang nabatian sa ginpatawag nga pueong ni LTO Chief Engr. Marlon Velez kaibahan ro Highway Patrol Group ag nagkaeain-eain nga asosasyon it transportasyon sa probinsya.
Dugang pa kara nga maskin ro National Inter-Agency Task Force (IATF) hay owa man it ginpagguwa nga bag-ong guidelines angot kara.
Ro klaro eamang suno kana hay ro mandato sa tanan nga mga Public Utility Jeep (PUJ) nga mag-adjust eon it pamasahe.
Gin-insister pa kara nga nagatao man sanda it diskwento umpisa nga ginpasaka sa ap-at ro andang pwedeng maisakay nga pasahero.
Apang, maskin nga ginpataasan eon ro seating capacity sa pampublikong transportasyon nagapabilin gihapon nga sangkiri ro numero it mga sumaeakay rason nga apektado ro andang kita.
Sambilog pa sigon sa nagapalisod kanda hay ro mataas nga presyo it produktong petrolyo.
