KALIBO, Aklan—Nagpangaywa ro probinsiya it Aklan sa Iloilo bilang Best Performing Province.
Raya hay kasunod it ginpatigayon nga 2021 EXCELL Awards it Department of the Interior and Local Government ukon DILG.
Suno kay Vice Governor Reynaldo “Boy” Quimpo nga raya hay bilang pagkilaea it DILG sa mga mayad nga hinimuan it mga local government units makaron nga dag-on sa tunga it ginapangatubang nga pandemya.
Pila pa sa mga nadag-an it probinsiya hay ro pagiging 1st Runner Up, Best Performing Province; Champion, Excellence in Local Legislation; 1st runner-up, Excellence in Social Governance; 1st runner-up, Excellence in Economic Governance; 1st runner-up, Excellence in Environmental Governance ag 2nd runner-up, Excellence in Administrative Governance.
Ginpahayag pa ni Vice Governor Quimpo nga mabahoe ro andang pagpasaeamat sa gintau nga pagkilaea nga nagapakita eamang it andang pagtinguha nga makatau it maayos nga serbisyo publiko.
Samtang, ginpabugae pa kara nga raya eon ro ikaywang dag-on nga gindeklarang kampeon ro aklan sa Excellence in Local Legislation nga nakabase sa performance it sangguniang panlalawigan.
Ro SP suno kana hay sambilog sa mga pinaka-una sa visayas ag Mindanao nga ISO certified nga nagapakita nga nakakasunod sanda sa international standard.
Sa pihak nga parte, ginpasiguro ni Atty. Quimpo nga antes nga magtapos ro andang session sa dec 20 hay maaprubahan ro proposed annual budget it probinsiya nga naga abot sa 2.5 billion pesos para sa 2022.
Raya hay 25 porsiyento nga mas mataas sa gin aprubahan nga pondo makaron nga 2021 nga kaabuan hay gin-realign ukon gin reprogram para sa covid 19 response.
