KALIBO, Aklan—Nagdangop sa Bombo Radyo ro sangka dalagita matapos nga ma-hack ro anang Facebook account ag gingamit pa raya agud nga makapagpangloko.
Suno kay Angeline Patricio ag residente it banwa it Numancia nga ko petsa 3 it Disiyembre kat nagmessage imaw sa sangka persona nga may fb name nga Nessa Vill Dela Cruz agud nga mag-inquire kungta it ginabaligya karang mga cellphone.
Dikara hay gintanyagan sigon imaw ni dela cruz it ginbaligyang cellphone nga ko katong tiyempo hay naka-promo pa sigon sanda.
Bilang paniguro nga magabayad ro tagreklamo sa anang ginabakae kungta nga cellphone hay ginpangayo it seller ro anang fb account ag password agud maikonekta sa andang line.
Apang nakibot eamang sigon imaw kat indi eun nana mabuksan ro anang account bangud nga ginbayluhan eun ro anang password.
Kat anang ginkompronta si dela cruz hay gin-ako kara nga imaw ro naghack sa account it tagreklamo ag nagpangayo para raya it 400 pesos nga kwarta agud nga matubos ro anang fb account.
Nagpamaeag pa sigon raya kana nga kung indi imaw magtao it kwarta hay anang pagagamiton ro nasambitan nga account para maka-scam agud samaron ro pagkatawo it tagrelamo nga si Patricio.
Samtang nagpanawagan man si Ms. Angeline Patricio sa publiko nga indi eun magpati pa sa scam nga gina-ubra ni certain Nessa Vill dela cruz kun sa siin ginagamit ro anang pangaean.
