KALIBO, Aklan—Mas ginataw-an it importansiya it mga Vietnamese ro Christmas Eve kaysa sa mismong adlaw it Paskwa.
Suno kay bombo international correspondent Era Patricio it Vietnam nga ro Paskwa idtu hay bukon it opisyal nga public holiday ag maabu nga mga tawo ro naga-isip nga raya hay holiday eamang para sa mga Kristiyano.
Apang ko ulihi hay amat-amat nanda nga na-adopt ro western culture eabi eon ro mga ulihing tubo.
Mag-eowas kara, ro nasambit nga nasyon hay dating kaparte it French Empire rason nga nagapabilin gihapon idtu ro French influences pag-abot sa Christmas traditions.
Kada bisperas it Paskwa, buhos ro mga tawo sa mga karsadahon it Ho Chi Minh city, ro pinakamabahoe nga siyudad sa Vietnam ag dating ginatawag nga Saigon kamana man sa mga Simbahang Katoliko rason nga ginabawae ro pagsueod it mga saeakyan sa mismong sentro it siyudad sa bilog nga gabi-i.
Gindugang pa ni Patricio nga sa pilang dag-on nana nga nakaexperiensiya it Paskwa sa Vietnam, kaeabanan sa andang selebrasyon hay ro pag-pilak it mga confetti, picture taking ag ro pag enjoy sa mga Christmas decorations ag Christmas lights it mga mabahoe nga hotel ag mga department stores.
Apang limitado sigon ro hueag it mga tawo bangud sa covid 19 pandemic.
Bukon it tanan nga tawo sa Vietnam hay Kristiyano rason nga ma-differentiate mo kon ro sangka baeay hay Buddhist bangud nga owa raya it dekorasyong pang Paskwa.
Maabu man suno kana nga mga tawo ro gustong magtambong sa Simbang Gabi agud nga makatan-aw it Nativity plays ag makapamati it mga Christmas song.
Kilaea man sigon it mga inunga si santa claus eabi eon ro mga naga eskwela sa international school.
Gindugang pa ni Patricio nga kapareho it mga pranses, ro pagkaon kada gabi-i it paskwa hay ro chocolate cake nga ro korte hay matsa pinutoe nga kahoy para sa dessert.
Mahilig man nga mag regalo ro mga Vietnamese it pagkaon.
Samtang, bongga sigon ro andang selebrasyon kada chinese new year nga kaabuan hay nagabakasyon it daywang domingo para kara.
