KALIBO, Aklan—Sa pihak it pandemya ag pagkaeain-eain it relihiyon sa nasyon nga Canada, uwa nagakalipat ro mga pumueoyo nga iselebrar ro tyempo it paskwa.
Suno kay Bombo International Correspondent Betsy Relente-Naipul it Toronto, Ontario, Canada, buean it Oktobre pa eamang hay nagapahaom eon sanda para sa bugana ag masinadyahong paskwa.
Makit-an eon ro espiritu it paskwa sa nasambit pa eamang nga buean bangud nga haeos tanan nga relihiyon basta paskwa ro paga-istoryahan hay nagapartisipar ro mga raya pinaagi man sa pagbutang it Christmas decorations sa kada panimaeay ag establisyimento.
Sa kapin 36 anyos nga pag-istar sa nasambit nga nasyon, nagkaeain-eain nga lahi it tawo ro anang nakasalamuha bangud sa pagpasakop man kara sa nagkaeain-eain nga organisasyon.
Ginpahayag dugang nga bugana ro mga Canadian kaibahan ro nagkaeian-eain nga lahi it pumueoyo pag-abot sa selebrasyon.
Kaparehas sa nasyon it Pilipinas, ro mga pinoy hay ginakabig nga family oriented rason nga ro mga overseas Filipino workers ukon OFW’s hay ginauna anay it mga raya ro andang ginapadaea nga pampaskwa sa andang pamilya sa Pilipinas antes nga taw-an it kahigayunan ro andang kaugalingon nga magselebrar it paskwa maskin maeayo sa andang pamilya.
