KALIBO, Aklan—Uman nga nagtao it bugae para sa probinsya it Antique ro sangka daeaga nga matapos nga magtop 5 sa nagtapos nga Customs Broker Licensure Examination.
Si Mariannie Suclan Dujali it Aklan Polytechnic College hay sambilog eamang sa nagpangibabaw sa kapin sa 821 nga mga nagbo-oe it nasambitan nga exam.
Imaw hay nakabo-oe it 85:00 nga score kung sa siin kaibahan man nana sa mga nagtop 5 sanday Timothy Paul Rodriquez Angeles it Philippine Merchant Marine School sa Las Pinas ag si Dan Mark Libaton Ygot it University of Cebu.
Samtang sa interbyu it Bombo Radyo, ginpahayag ni Dujali nga eubos ro anang kalipay matapos nga masayuran ro resulta bangud owa gid nana ginaeuaman nga maka-abanse sa anang mga kaibahan nga nagbo-oe it exam.
Dugang pa kara nga bilang covid-19 survivor hay bukon it naging madali ro anang mga inagihan mas kapin ag kat nagpositibo imaw sa covid-19 hay kasagsagan man it andang review.
Sa pihak kara hay nagtinguha imaw nga maabot ro andang handom nga makapasar agud mataw-an sigon it kabaylo ro anang pagresign sa trabaho para eamang maka focus sa pagreview.
Nasayuran nga si Dujali hay pitong dag-on nga nagtrabaho anay agud nga makasuporta sa anang pamilya pagkatapos it kolehiyo.
Apang makarun eamang nga dag-on kat ginpursige eun nana nga magtake it exam sa anang tinapusan nga kurso ag pagguwa it resulta hay nakasueod pa imaw sa top 5.
Maduduman nga gin-anunsiyo it Professional Regulation Commission (PRC) nga kapin sa 282 sa 821 ro nakapasar sa nagtapos nga Customs Broker Licensure Examination nga ginpatigayon it Board for Customs Brokers sa Manila, Cebu ag Davao ko nagtaliwan nga November 2021.
Nagguwa ro resulta tatlong adlaw pagkatapos it ginpatigayon nga eksaminasyon.
Samtang maga umpisa man sa Disyembre 17 hasta 23, 2021 ro registration para sa pag-isyu it andang Professional Identification Card (ID).
