KALIBO, Aklan—Kasunod it pag-eayo it bagyong Odette sa nasyon, nag-umpisa eon man nga nag-uli sa andang natungdan nga mga baeay ro mga nag-evacuate nga residente sa barangay Tambak sa banwa it New Washington.
Suno kay punong barangay Lucille Macario it nasambit nga lugar nga bandang alas-12 kabi-i hasta alas-2 it aga-aga ro grabeng pagpanaeasa it bagyo.
Sa mayad nga swerte suno kana hay owa it daea nga uean ro mabaskog nga hangin rason nga medyu mahagan-hagan ro anang epekto.
Bangud nga nagmayad eon ro daeagan it tiempo, nag-uli eon suno kana ro mga nagbakwit sa andang gintaeana nga evacuation center ro tambak elementary school.
Kapin sa 26 nga pamilya suno kana ro nag-evacuate sa nasambit nga eskwelahan ko huwebes it agahon bangud sa pagkabaeaka bukon eamang sa baha kundi sa kahalitan it mabaskog nga hangin sa andang mga baeay nga posibleng magbutang sa peligro sa andang kabuhi.
Bangud nga kalmado eon man ro humbak sa dagat, amat-amat eon nga nagpanglimpyo ag nagpang-repair it mga nasamad nga portion it baeay ro ibang mga residente.
Gindugang pa ni kapitan Macario nga ro mga nag evacuate hay gintaw-an nanda it mga family food packs.
