KALIBO, Aklan—Nagapadayun sa gihapon ro mga programa ag bulig nga ginapaabot para sa mga Person with Disabilities ukon PWD’s.
Raya ro ginklaro ni Mr. Randy Rebaldo it Person with Disabilities Affairs Office ukon (PDAO)-Aklan.
Suno kana nga raya hay apisar nga ginbuhinan ro andang budget makarun nga dag-on 2021.
Dugang pa kara nga ko dag-on 2020 kat nagakinahangean it dugang nga pundo ro gobyerno probinsyal para problemang medical sa tunga it pag-eopok it coronavirus disease ukon COVID-19 pandemic.
Bangud kara hay ginbuhinan it 50 porsiyento ro andang pondo.
Sa pihak kara padayun ro pagpatikasog it andang taeatapan agud nga indi maapektuhan ro andang mga programa partikular eun ro mga assistance para sa mga pamatan-on nga naga eskuwela ag assistive device assistance man para sa mga nagakinahangean it wheel chair ag maabo pang iba.
Agud nga maka-avail it mga nasambitan nga bulig hay kinahangean eamang nga magdangop sa andang opisina ag magpakita it mga nagakaigo nga dokumento bilang pamatuod nga raya hay nagakadapat gid man nga magbatun it bulig maghalin sa andang taeatapan.
