KALIBO, Aklan—Hugut ro gina-obra nga pagbantay it barangay council it Laguinbanua East, Numancia sa gintaeana nga firecracker zone sa andang lugar makaron nga nagahilapit eon ro pagsug-aeaw sa Bag-ong Dag-on.
Suno kay Punong barangay Lalaine Tan it nasambit nga lugar nga partikular nanda nga ginabantayan ro pagpatuman it health and safety protocol kamana man nga ginatutukan it andang mga barangay tanod ro daeagan it trapiko.
Maskin suno kana nga balik eon sa normal ro pagbaligya it mga paeupok ag mga pailaw , nataeupangdan nga sangkiri eamang ro supply it mga vendors ag nagnaba man ro numero it mga nagabaligya.
Halin sa dating 23 hay 16 eon lang sigon ro mga stall vendors makaron.
Gindugang pa ni Kapitan Lalaine nga hinduna nga gabi-i hay doble ro andang pagahimuon nga pagbantay bangud sa ginaeauman nga pagbuhos it mga bumaeakae bangud sa “last minute” nga pagpamakae.
Ginlaygay pa it opisyal sa publiko nga nagabakae it mga paeupok nga magbakae it temprano agud nga malikawan ro pagdueutdutan ag mayad nga usuyon ro PS mark sa mga produkto.
Nasayuran nga todo bantay man sa lugar ro mga katapo it Numancia PNP ag Bureau of Fire Protection.
