KALIBO, Aklan—Medyo naging mas madahan makaron ro mga pumueoyo it Australia sa pagsug-aeaw it bag-ong dag-on.
Raya hay matapos nga makalista ro nasyon it masobra 33,000 nga bag-ong kaso it COVID-19 sang adlaw antes matapos ro 2021.
Suno kay Bombo International Correspondent Denmark Suede it Sydney, Australia nga kaabuan sa mga residente hay ginpakamayad eon lang nga limitahan ro andang ginapatigayun nga social gatherings bangud sa pagkabaeaka nga ma-infect it deadly virus.
Sa pihak kara, naga-abot man sa P250 million ro gingastos it City of Sydney sa ginpatigayun nga fireworks display kadungan it pagsug-aeaw sa 2022.
Suno kay Suede, mas mabahoe ag bongga ro ginpatigayun nga fireworks display kabi-i kung igakumpara ko nagtaliwan nga dag-on.
Ro mga Australiano suno kana hay mahilig magparty rason nga kaeabanan sa mga tawo hay naga-adto sa siyudad para magkinasadya.
Aminado si Suede nga posible pang maglobo ro numero it mga bag-ong kaso matapos ro New Year’s celebration.
Sa makaron, nagapabilin nga bukas ro border it Australia kamana man nga owa it masyadong restriction matapos nga mag-abot it kapin sa 91 porsyento it andang populasyon ro nabakunahan eon kontra sa COVID-19.
