KALIBO, Aklan–Matapos nga mabatian sa Bombo Radyo ro panawagan it pamilya Perez nga nagapangayo it bulig agud nga maipaeubong ro namatay karang ama hay owa eun nagduha-duha ro sikat nga youtuber nga si Archie Hilario ag ro bilog nga team it Pobreng Vlogger ag gilayon nga nagpaabot it bulig financial sa nagakalisod nga pamilya.
Sa interbyu it Bombo Radyo ginpahayag it youtuber nga si Mr. Hilario nga maghalin sa andang kita sa you tube ag facebook hay nakapaabot sanda it kapin sa 10,000 pesos nga cash bilang bulig kay Mr. Joselito Crisostomo Perez it Barangay Pagsanghan, Banga agud nga maipaeubong ro anang namatay nga ama nga si Enicito Patriarca Perez.
Ginapahayag dugang ni Mr. Hilario nga sa andang pagbisita sa lugar hay andang nabatyagan ro kasubo it pamilya nga namatayan bangud base sa andang nasaksihan hay owa heaos it may nagabulig kara.
Samtang, ginpahayag man kara nga magapadayun ro andang pagbulig sa mga tawong eubos nga nagakinahangean it bulig hasta sa maabot it andang masarangan.
Sa pihak nga parte, matapos nga ma ere sa Bombo Radyo ro pagpangayo it bulig it pamilya Perez hay bumuhos ro mga nagpaabot it bulig kanda.
Bangud kara hay natigayon eun nga maipatikasog ro eubong it namatay nga ama ag naka-schedule eun ro eubong sa adlaw it Lunes petsa 10 it Enero bandang alas-2 sa hapon sa Saint Joseph Parish Church sa banwa it Banga.
