KALIBO, Aklan—Sa pihak it nagakatabu nga maeapnagon nga hub-eag protesta sa nasyong Kazakhstan, ginpasiguro ni Vice Consul Catherine Alpay it Philippine Embassy sa Moscow, Russia nga eowas ro mga Pilipino nga nagatrabaho sa nasambit nga nasyon.
Sa interview it Bombo Radyo, aminado imaw nga nakaangkon it problema sa internet connection sa nagkaeain-eain nga lugar sa Kazakhstan, partikular sa Almaty City, apang padayun ro andang pag-usoy it pamaagi agud nga makipag-angot sa pilang lider it filipino community idtu.
Gin-abisuhan man sigon nanda ro mga Pilipino nga mag-stock it mga nagapangunang kinahangeanon kapareho it mainom nga tubi ag pagkaon bangud nga kaabuan kanda hay owa nagaguwa it baeay mag-eowas pa nga may curfew nga ginapatuman ro gobyerno nga magabuhay hasta sa enero 19 it makaron nga dag-on.
Ginduea man nana ro pagkabaeaka it pamilya it mga OFW bangud nga amat-amat eon sigon nga nagabalik sa normal ro sitwasyon matapos nga gindeklara ro state of emergency agud nga uman nga mabuytan it gobyerno ro control sa nasyon.
Napabalita nga nagsaka eon sa waeo ro namatay nga security forces umpisa nga magtuhaw ro kinagamo.
Nasayuran nga nag-umpisa ro maeapnagon nga hubeag protesta bangud sa padayun nga pagtaas it presyo it langis.
Nauna kara, hasueod man it mga anti-government demonstrators ro Main Airport sa Almaty City ko nagtaliwan nga adlaw.
Ro Philippine Embassy sa Moscow, Russia ro presenteng may hurisdiksyon sa Kazakhstan.
Ginpahayag ni Vice Consul Alpay nga ginatantiya nga kapin sa 1,500 ro mga Pilipino sa Kazakhstan nga nagatrabaho bilang manugturo, engineers, construction workers ag household service workers.
