KALIBO, Aklan—Uman nga sumipa ro COVID-19 cases sa Pilipinas sa ulihing diminggo it Disyembre 2021.
Panan-aw it mga eksperto raya hay bangud sa mas makataeapon nga omicron variant nga imaw man ro rason it pagtinaas it mga kaso sa ibang nasyon.
Suno kay Dr. Rodney Valencia, sangka Internist-Pulmonologist nga kaabuan sa mga sintomas it mga natapnan it delta variant it covid-19 hay ro eagnat, sore throat, diarrhea, runny nose ag nalisdan sa pagginhawa.
Samtang sa omicron ro mga sintomas eamang kara hay ro pagkaangkon it sip-on ag ubo.
Kung makabatyag man it eagnat, pagsakit it ueo ag sore throat hay bukon sigon it mas grabe kung igakumpara sa delta.
Owa man sigon haeos naka eksperyensiya it pagkalisod sa pagginhawa ro mga pasyenteng may omicron.
Posible man sigon nga magguwa ro mga sintomas it omicron variant sa sueod eamang it 2 hasta 3 adlaw.
Apisar nga ginahambae nga mild eamang ro sintomas nga daea it omicron, indi man sigon dapat maging kampante ro publiko.
Raya hay bangud puwedi pa gihapon nga magdaea it problema ro bag-ong variant sa mga owa pa nabakunahan, mga magueang, ag mga may masakit.
Posible man sigon nga magresulta sa pagnaba it oxygen level ro omicron variant.
