KALIBO, Aklan—Sa pihak it limitadong oras it preparasyon, nahimo it pambato it Brgy. Mobo, Kalibo nga magpangibabaw sa 16 tanan nga mga kandidato para sa Miss Kalibo Ati-atihan 2022.
Malipayon ag madinaeag-on nga napasa-alima ni Miss Nichole Therese Buyoc ro titueo matapos imaw nga ginkoronahan bilang Miss Kalibo Ati-Atihan 2022.
Nagapati si Buyoc nga ro indi matupungan nga effort ag confidence it anang team ro naging yabe para mai-uli ro korona.
Makabig sigon nga last minute ro anang desisyon sa pag-intra sa kompetisyon apang owa raya naging sab-eag para sa anang naging preparasyon.
Naka-sentro sigon ro anang adbokasiya sa pagbulig sa mga pamatan-on kamana man nga magserbing inspirasyon para magpadayun sa pihak it mga kalisod nga gina-agyan sa kabuhi.
Sa pihak nga parte, ginkabig man bilang Miss Kalibo Ati-Atihan 2022 – Vibrant ro pambato it Brgy. Pook nga si Kristine Tobe Garcia; Miss Kalibo Ati-Atihan 2022 – Livable si Michelle Sy it Brgy. Old Buswang; Miss Kalibo Ati-Atihan 2022 – Greener ro pambato it Tinigaw nga si Juliana Mel Villanueva samtang ginkoronahan bilang Miss Kalibo Ati-Atihan 2022 – 1st Runner up si Miss Krystal Faith Dominguez it Brgy. Mabilo ag Miss Kalibo Ati-Atihan 2022 – 2nd Runner up ro pambato it Brgy. Bakhaw Norte nga si Shebaniah Ann Naigan.
