KALIBO, Aklan—Makabig nga madinaeag-on ro ginhiwat nga search for Miss Kalibo Ati-atihan 2022 ko gabi-i it Biyernes.
Suno kay Mr. Rey Villaruel, Chairman it Organizing Committee nga naging maayos ro daeagan it tanan halin sa andang preparasyon ag sa mismong adlaw it kompetisyon.
Ginpasidunggan man kara ro talento it anang working committee nga ginapangunahan nanday Kenneth Ian Billones, Jacquize Joy Iledan ag Yjhyl Castillo.
Aminado si Villaruel nga bukon it madali ro pagpatigayun it virtual event sa tunga it pandemya bangud nagakinahang-ean raya it maeawig nga preparasyon.
Ginpasaeamatan man kara ro bilog nga suporta it lokal nga gobyerno it Kalibo kaibahan ro mga naging sponsors makaron nga dag-on.
Gindayaw man it opisyal ro determinasyon ag dedikasyon it mga kandidata nga nagpasakop para maging maayos ro resulta it kompetisyon.
