KALIBO, Aklan—Tinamaan man it COVID-19 si 1st district Sangguniang Panlalawigan member Atty. Harry Sucgang.
Raya hay matapos nga magpaidaeum sa RT-PCR test ko nagtaliwan nga adlaw para sa andang nakataeana kunta nga pag-uli sa Aklan ko domingo nga adlaw kaibahan ro anang asawa nga si Dra. Nelly Sucgang.
Suno kay Atty. Sucgang nga sa mayad nga swerte hay nag-negatibo ro anang misis sa pihak nga pirme man sanda nga magkaibahan.
Ginpahayag dugang nga maskin nga grabe ro andang pagdahan agud nga makalikaw sa virus ag pagsunod sa mga health protocols hay tinamaan gihapon imaw it COVID-19.
Owa sigon imaw it anuman nga nabatyagan nga grabeng sintomas mag-eowas sa pagkatoe it anang tutunlan ag kon amat nga ubo.
Antes nga nag-positibo sa sakit, may pila sigon imaw nga nakasalamuha sa metro manila nga anang naka-transaksyon.
Gina-trace eon sigon nana ro mga raya agud nga maabisuhan.
Sambilog sa anang naging close contact hay si manila mayor isko Moreno matapos nga makaangkon it picture-taking sa pagbo-oe nana it mga election paraphernalia sa andang headquarters.
Ginpasiguro man nana nga matapos ro anang isolation period hay uman imaw nga magapa-swab test agud nga makabiyahe eon pauli sa Aklan.
Ginpahayag dugang nga imaw ag ro anang misis hay fuly vaccinated eon ag may booster shots pa kontra COVID-19.
Sa pihak nga parte, ginlaygay ni Dra. Nelly Sucgang nga padayun nga magdahan kontra sa COVID-19 apang indi mag-panic.
Makaron nga naka-experiensiya sigon it flu season sa nasyon ag nagdungan pa ro deadly virus, kinahangean nga mapabaskog ro immune systema ag hugut nga pagsunod sa health and safety protocol.
Importante man suno kana nga kon makabatyag it sintomas hay insigida nga mag isolate.
Mabahoe nga bulig man sigon ro magpabakuna bilang proteksyon sa nasambit nga sakit.
Nagaeaum si Dra. Sucgang nga pagkatapos it naexperiensiyahan nga surge tuga it omicron variant ag pagnaba it kaso hay eubusan eon nga maduea ro pandemya.
