KALIBO, Aklan—Hugot nga ginapatuman makarun ro ‘No vax, no ride policy’ sa mga pasahero nga naga-agi sa Kalibo International Airport.
Suno kay Engr. Eusebio Monserate Jr., Manager it Civil Aviation Authority of the Philippines (CAAP-Aklan) nga sandig sa ginpaguwa nga soeundanan it Department of Transportation (DOT), kinahangean nga magpakita it vaccination card ukon vaccination certificate ro mga pasahero nga magasakay sa ano man nga klase it pampublikong transportasyon.
Samtang ro mga owa man it may maipakita nga vaccination card hay kinahangean nga magpakita it health consideration nga nagapakita nga raya hay indi puweding mabakunahan.
Dapat man nga raya hay maghalin sa Municipal Health Office ukon sa Provincial Health Office.
Mag-euwas sa pagpakita it health consideration hay kinahangean nga magpakita it negatibong resulta it RT-PCR test ro mga bukon it bakunadong indibidwal.
Nasayuran nga sa makarun hay maabo eun nga mga pasahero ro napaseawan nga makabiyahe paadto sa andang destinasyon matapos nga mabaeabagan it mga tawuhan sa paeuparan bangud sa kakueangan it papeles.
