KALIBO, Aklan—Kapin sa 12 ka mga linemen it Aklan Electric Cooperative (Akelco) ro ginpadaea sa Negros Occidental para magbulig sa pagrestore it kuryente matapos ro pagpanaeasa it bagyong Odette sa pilang lugar sa nasyon ko Disyembre 2021.
Suno kay Atty. Ariel Gepty, General Manager it Akelco, tanan nga mga electrive cooperative sa bilog nga Pilipinas hay nagabueoligan para madasig nga maibalik ro suplay it kuryente sa mga probinsya ukon rehiyon nga grabeng naapektuhan it kalamidad kapareho it bagyo.
Raya sigon hay sa pamaagi it ginbilog nga Task Force Kapatid kung siin nauna sandang nagpadaea it tig sambilog nga team sa Antique Electric Cooperative ag Guimaras Electric Cooperative.
Ro kada team hay ginabilog it an-om ka mga linemen it Akelco.
Matapos sigon ro augmentation sa daywang ka mga probinsya hay sunod sandang ginpadaea sa Kabankalan, Negros Occidental.
Nasayuran nga naga-abot sa P300 million eon ro naging kahalitan sa bahin it andang kooperatiba bangud sa maeapnagon nga epekto it bagyo.
Nakataeana sigon nga magbalik sa probinsya it Aklan ro daywang team sa Enero 31 kung siin ro tanan nga gastos hay ginsabat it Akelco.
Ginpasiguro man ni Atty. Gepty nga haum sandang magpadaea it dugang nga tawuhan sa iba pang mga probinsya nga naapektuhan it bagyo engkaso nga kinahang-eanon.
