KALIBO, Aklan—Uman nga ginrekomenda nga ipaidaeum sa lockdown ro Aklan District Engineering Office hasta sa Enero 23.
Raya hay matapos ro kumpirmasyon ni Provincial Health Officer I Dr. Cornelio Cuachon, Jr. nga may 73 nga empleyado it nasambit nga taeatapan ro nagpostibo sa COVID-19 sa ginpatigayon nga haeos 263 rapid antigen tests ko nagtaliwan nga Enero 19.
Ro nasambit nga tikang hay bilang kaparte it comprehensive Covid-19 prevention and control program it Department of Public Works and Highways (DPWH).
Ro resulta sa rapid tests hay pagakumpirmahon pa gihapon pinaagi sa RT-PCR test.
Sa kabilugan nga 73 nga nag-positibo, kapin sa 37 nga empleyado ro asymptomatic ukon owa it anuman nga sintomas samtang ro nabilin hay symptomatic apang mild eamang ro sintomas.
Gindugang pa ni Dr. Cuatchon nga kinahangean nga magpaidaeum ro mga raya sa isolation.
Haeos tanan eon man sigon nga empleyado hay fully vaccinated.
Kapin sa 53 nga iba pang empleyado ro ginpaidaeum sa rapid antigen testing ko Enero 20.
Ro mga naging close contact it mga nagpositibo hay obligado sa gihapon nga mag-quarantine sa sueod it limang adlaw maskin nga nag negatibo sa sakit.