KALIBO, Aklan—Nagapadayun ro road repair it Department of Public Works and Highways ukon DPWH-Aklan sa pilang portion it national highway halin sa Kalibo paagto it Banga.
Suno kay Engr. Joey Ureta, Maintenance Division Head it DPWH-Aklan nga ro pilang daeanon nga apektado it concrete reblocking activities hay ro portion it Estancia, Kalibo maeapit sa NVC Capitol nga one-lane nga may haba nga 55 meters; Tigayon, Kalibo nga one-lane man ag may haba nga 103 meters ; portion it Linabuan Sur, Banga nga one-lane nga may sukat nga 53 meters kun sa siin ro 30 meters kara hay two-lanes apang ginklaru it DPWH nga owa pa naumpisahan kamana man ro portion it Libas, Banga nga two-lanes nga may haba nga 490 meters nga taeapuson eon.
Gindugang pa ni Engr. Ureta nga may oeobrahon man sanda nga karsada sa portion it Fulgencio, Balete nga mga 100 meters ro haba ag sa parte it tulay it Balete.
Mag-eowas kara, pagatutukan man nanda ro portion it Aranas, Balete, Cabangila, Altavas ag iba pa.
Agud nga malikawan ro disgrasya sa daeanon, gin abisuhan sigon nanda ro mga contractor it proyekto nga magbutang it mga road signages nga visible sa mga motorista.
Sa pihak nga parte, may timeline sigon sanda antes nga maagihan ro nasambit nga mga karsada bangud sa curing period nga ginatawag para sa cement concrete road.
Sa pihak nga parte, gindugang pa ni Engr. Ureta nga maskin nga kueang sa manpower hay padayun ro andang operasyon.
Raya hay matapos nga magpositibo sa COVID-19 ro pila sa andang mga katrabho ag kinahangean nga mag-isolate.
Madumduman nga 73 nga empleyado it Aklan District Engineering Office ro nagpostibo sa sakit sa ginpatigayon nga haeos 263 rapid antigen tests ko Enero 19.