KALIBO, Aklan—Bukon it pabor ro pilang miyembro it PAMALAKAYA sa plano it Department of Agriculture nga mag-import it isda partikular ro small pelagic fish kapareho it galunggong, matambaka ag bonito.
Ginpahayag ni Wilma Macario-Trinidad, miyembro it PAMALAKAYA nga dapat mas ginataw-an it prayoridad it gobyerno ro pagpaumwad it pangabuhian it mga lokal nga mangingisda imbes nga magpatigayun it fish importation.
Nagapati si Trinidad nga magatuga raya it mabahoe nga kalugian sa mga mangingisda engkaso nga madayun ro pag-angkat it nasyon it pilang klase it isda halin sa China ukon Vietnam.
Nagaeaum sigon sanda nga maghimo it alternatibong solusyon ro gobyerno agud nga mapabaskog ro produksyon it mga panagat sa bilog nga nasyon para malikawan ro kakueangan it suplay kamana man nga mapanaba ro presyo kara sa merkado.
Sa pihak ga parte, hugut man nga nagapamaeabag ro pilang ka mga mangingisda sa probinsya it Aklan sa proposisyon it Agriculture sector.
Suno kay Richard Mark Parohinog, posible sigon nga raya pa ro magapatay sa pangabuhian it kapareho nana nga mangingisda.
Makaron pa eamang sigon hay apektado eon ro andang kita bangud sa pandemya rason nga mas mabudlay eon para kanda kun mag-umpisa eon ro pag-abot it mga imported nga isda.
Nasayuran nga plano it DA nga mag-import it 60,000 metric tons nga isda bangud sa na-eksperyensyahan nga kakueangan sa suplay matapos ro naging epekto it bagyong Odette sa mga fish producing-region kapareho it Visayas ag Northern Mindanao.
