KALIBO, Aklan—Eubus ro kalipay ag pagpasaeamat it pamilya ni Filipino fighter Mark “Magnifico” Magsayo sa naangkon kara nga kauna-unahan nga world boxing title.
Suno kay Judy Magsayo, ama ni Mark nga dream come true bukon eamang para sa anang unga kundi sa bilog nga pamilya ro anang kadaeag-an kontra kay Gary Russell, Jr.
Ginpromisa sigon it anang unga nga pagabak-ean sanda it house and lot sa kaparte it anang nadag-an.
Madumduman nga naagaw ni Magsayo ro korona ni Russell para sa WBC featherweight title sa bakbakan nga ginpatigayon sa Atlantic City, New Jersey, USA.
Bangud kara, napabilin ni Magsayo ro anang undefeated record ag napasaka pa sa 24-0 nga may 16 knockouts.
Owa pa sigon sanda it ideya kon hin-uno maga-uli it pilipinas ro anang unga.
Apang sa andang pamilya hay magapatigayon sanda it handaan bilang pagpasaeamat.
Nasayuran nga ikatlo si Mark sa ap-at nga magmaeanghud ag sa batang edad nga waeo hay nagka-interes raya sa boksing sa ALA gym sa tagbilaran.
Hard training suno kana ro pinaka-sekreto it anang unga sa kadaeag-an nga naagum.
Kaibahan ro masobra sa 300 nga mga kasimanwa, nagtan-aw it live ro bilog nga pamilya ni mark sa sueod it City Hall it Tagbilaran, Bohol nga libreng gintanyag it andang alkalde.
Samtang, kasunod it anang pagdaog, haum sigon ro bag-ong world champion nga suk-ean ro maskin sin-u man.
Ginatugyan man ni Magsayo ro pagdesisyon sa anang promoter nga si Sean Gibbons, ro rematch kontra kay Russell.
