KALIBO, Aklan—Nagapadayun ro imbestigasyon sa natabu nga pagpakamatay ni Miss USA 2019 Cheslie Kryst, apang nagapati ro kapulisan nga ro dating beauty queen hay nag-eumpat gid man halin sa anang gina-istaran nga 9th floor it 60-story Orion building sa New York City nga naging rason it anang insigidang pagkamatay.
Suno kay Bombo International Greg Aguilar it California, USA nga base sa inisyal nga imbestigasyon, ulihing nakita si Kryst sa terrace it building sa ika-29th floor.
Sang oras antes ro anang kamatayon, nag-share raya it anang litrato sa anang Instagram nga may caption, “May this day bring you rest and peace.”
Mabatyagan sigon ro sobrang kasubo sa estados unidos bangud sa nasambit nga insidente.
Ma-eowas nga bata pa sa edad nga 30 hay si Kryst sigon ro nagbukas it oportunidad nga sarang nga makapasakop ag makadaog sa mga beauty pageant ro mga babaye nga may black ag brown nga pamaniton.
Makabig man sigon nga beauty and brains imaw bangud sa pagiging abogado ag mayad nga TV host.
Gindugang pa ni Aguilar nga paealigban sa tanan kon ham-an raya nga nagpakamatay sa pihak nga una eon kana ro tanan.
Ginatumod pa it mga otoridad ro pinakarason it anang pagkamatay.
Owa pa nagtau it dugang nga detalye ro anang mga amigo ag katrabaho bangud sa ginapangayo nga privacy it anang pamilya.
