KALIBO, Aklan—Padayun nga gina-engganyo it Philippine Statistics Authority (PSA) ro publiko nga magparehistro eon para sa Philippine Identification card ukon Phil-ID.
Suno kay PSA-Kalibo Head Engr. Antonet Catubuan nga nagbutang sanda it 18 ka mga personnel para magdumaea sa tatlo ka mga registration center nga andang gintukod.
Sambilog eon kara ro registration center nga nahamtang sa Osmeña Avenue, Kalibo kung siin sakop kara ro banwa it Tangalan, Makato, Numancia, Lezo ag Malinao.
Kung siin ginasundan man raya it registration center sa Nabas nga sakop ro banwa it Ibajay, Buruanga ag Malay kamana man ro registration center sa Banga nga sakop ro banwa it Altavas, Balete, Batan, Libacao ag Madalag.
Raya sigon hay bukas para sa tanan nga pumueoyo nga naga-edad it limang dag-on pataas.
Ginpahayag pa ni Engr. Catubuan nga may mga personnel sanda nga nagapatigayun it mobile registration sa kabarangayan agud nga mas mataw-an it kahigayunan ro mga owa pa nakapa-rehistro.
Target sigon it taeatapan nga makaparehistro it kapin sa 5,900 nga indibidwal para sa buean it Enero ag 11,500 indibidwal man sa Pebrero.
Samtang, ko nagtaliwan nga dag-on sigon hay naabot nanda ro 101 percent nga Philsys registrants ukon katumbas it 453,107 nga indibidwal sa bilog nga probinsya it Aklan.
