KALIBO, Aklan—Sa pihak it apela it gobyerno nga indi anay magbiyahe agud nga matapna ro uman nga pagtaas it kaso it covid-19, maabu sa gihapon nga mga Chinese ro nag-uli sa andang natungdan nga mga probinsiya agud nga magselebrar it Lunar New Year.
Raya ro ginpahayag ni Bombo International Correspondent Antet Meren, tumandok it banwa it Banga ag presenteng nagatrabaho sa Zhejiang, China.
Suno kana nga ro Chinese New Year ro ginahueat-hueat it mga empleyado sa nasambit nga nasyon bangud nga makabig raya nga sangka mabahoe nga family holiday, kun sa siin, ro bakasyon hay naga-eawig it sang domingo hasta daywang domingo.
Raya sigon ro kahigayunan it minilyon nga mga tawo nga nag-migrate para sa trabaho agud nga maka-uli ag makabisita sa andang mga ginikanan, asawa ag mga inunga nga andang gin-aywan para sa trabaho.
Gindugang pa ni Meren nga uman nga naga-strikto ro China agud nga matapna ro outbreak it deadly virus
Sa pihak nga parte, nagpatigayon man sigon it fireworks display ro andang lokal nga gobyerno, apang kaabuan sa mga residente hay gintan-aw raya pinaagi sa livestreaming.
Nakasanayan eon man sigon it mga Chinese ro maabuan nga paghanda it mga pagkaon nga naga-abot kon amat it 20 nga mga menu sa sangka lamesa.
Tradisyon man ro pag-regalo it cash eabi eon it mga katigueangan apang owa eon raya ginasunod it mga batang henerasyon bangud sa pag-adopt it cashless transaction.
