KALIBO, Aklan—Gindayaw ni Atty. Plaridel Morania, sangka batikang abogado sa Aklan ro ginpatigayon nga Presidential Forum nga ginpangunahan it kapisanan ng mga brodkaster ng Pilipinas ukon KBP kabulig ro Bombo Radyo Philippines ag iba pang estasyon it radyo ag telebisyon makaron nga adlaw, Pebrero 4.
Suno kay Atty. Morania nga pinaagi kara hay nataw-an it kahigayunan ro publiko nga makumpara ro mga nagapadaeagan nga aspirante sa pagka-pangueo.
Mag-eowas kara, nabatian ro andang mga plata porme de gobyerno engkaso nga swertehon nga makapungko sa nasambit nga pwesto.
Sa pihak kara, kinamatarung sigon it sangka aspirante kon maga-atras sa imbitasyon sa forum ag mas pabor sa one-on-one show nga gintaeana sa sangka kandidato eamang.
Madumduman nga sa presidential forum “panata sa bayan” nga ginpaguwa sa FB live it tanan nga estasyon it bombo radyo ag star fm sa bilog nga nasyon, gin-imbitahan sa programa ro front-running candidates para sa May 9 elections nga ginaeakipan nanday Vice President “Leni” Robredo, Senator Panfilo “Ping” Lacson, Senator Emmanuel “Manny” Pacquiao Sr., ag Manila Mayor Francisco “Isko Moreno” Domagoso.
Absent ukon no-show si dating senador Ferdinand “Bongbong” Marcos Jr.
Ro anang pagpamalibad nga maka-atubang ro anang mga karibal hay bangud sa unang natangu-an nga commitment nga indi mapaiway.
Sambilog sa nagpangutana sa mga aspirante hay ro news director it Bombo News Center nga si Bombo Elmar Acol.
