KALIBO, Aklan—Ginkalipay it Philippine Chamber of Commerce and Industry ukon PCCI-Aklan ro pagpatag-od sa ginapatuman nga curfew hour sa bilog nga probinsiya it Aklan.
Raya hay kasunod it ginpagguwa nga bag-ong advisory ni Aklan Governor Florencio Miraflores ko Pebrero 3.
Suno kay Mr. Jun Aguirre it PCCI-Aklan nga mabahoe raya nga ginhawa para sa mga negosyante nga eubos nga naapektuhan ro pangabuhian umpisa nga magtuhaw ro pandemya.
Makabulig sigon raya sa amat-amat nga pagbangon it ekonomiya ag makatao it dugang nga oportunidad sa maabu nga pumuoeyo.
Ginpaathag pa ni Aguirre nga naghinyu sanda sa gobyerno probinsyal ko nagtaliwan nga dominggo nga patag-uran ro curfew agud nga mataw-an it kahigayunan ro mga negosyo nga makabukas sa mas mahaba nga oras.
Pila sigon sa mga naapektuhan ro paeangitan-an hay ro mga maisot nga negosyante kapareho it nagabaligya it barbeque ag balut kun kabi-i.
Ro bag-ong curfew hour sa mainland Aklan hay naga-umpisa it alas-11:00 it gabi-i hasta alas-4:00 it aga-aga.
Samtang, ro operasyon it establisyemento hay umpisa it alas-5:00 it agahon hasta alas-11:00 it gabi-i kamana man nga ro pampublikong transportasyon hay naga-umpisa it alas-4:00 it aga-aga hasta alas-11:00 it gabi-i.
