KALIBO, Aklan—Ginpasaeamatan it mga opisyales it Brgy. Agbanawan, Banga ro pagtaeana it pondo it Provincial Engineering Office (PEO)-Aklan para sa pagsemento it andang provincial road.
Suno kay Kagawad Joven Dela Cruz nga mabuhay eon nanda nga problema ro eubak-eubak nga karsada rason nga mabahoe ro andang pagpasaeamat sa gobyerno probinsyal.
Kabilugan sigon nga P3 million ro gin-alokar nga pondo it PEO sa provincial road it Brgy. Agbanawan ag Brgy. Libas.
Mabahoe sigon raya nga bulig agud nga mabawasan ro aberya sa mga residente ag motorista nga adlaw-adlaw naga-agi sa nasambit nga karsada.
Sa pihak nga parte, ginpaathag ni Engr. Moriel Macavinta, Maintenance Head it PEO-Aklan nga tapos eon raya it bidding ag na-award eon sa contractor.
Ginaeauman nga maga-umpisa eon ro konstruksyon makaron nga buean it Pebrero.
Aminado si Engr. Macavinta nga bukon it bastante ro nasambit nga kantidad agud nga matapos ro proyekto.
Ginasugid nga 8 inches ro damoe it pagsemento sa karsada agud nga maging mapag-on bangud nga indi malikawan ro pag-agi it daeagkuan nga saeakyan.
Ginpasiguro man kara nga pagatinguhaan nanda nga mataw-an raya it dugang nga alokasyon agud nga eubusang matapos ro konstruksyon.
Mag-eowas sa Agbanawan-Libas road hay ginpondohan man it PEO ro Cupang-Ugsod road ag ro Brgy. Venturanza.
