KALIBO, Aklan—Aminado ro pamunuan it Municipal Planning Development Office (MPDO) nga owa naeakip sa andang budget makaron nga dag-on ro pagpa-ayos it mga samad nga traffic light sa pilang kalye sa banwa it Kalibo.
Ginakaeakipan raya it traffic light sa bahin it F. Quimpo Street Corner Mabini Street, Roxas Avenue Corner Toting Reyes Street ag Sitio Karumahan, Brgy. Bakhaw Norte, Kalibo.
Suno kay Municipal Planning Coordinator Engr. Marlo Villanueva nga magabutang anay sanda it mga traffic enforcer sa natungdan nga mga lugar para ipabilin ro maayos nga daeagan it trapiko samtang nagahueat pa it pondo.
Dugang pa kara nga indi masarangan it mga local electrician nga ayuson ro kasamaran sa mga traffic lights.
Pila sa ginapanan-aw nga rason ni Engr. Villanueva sa madali nga pagkasamad kara hay ro masami nga pag-fluctuate it kuryente.
Nasayuran nga mabahoe nga bulig ro mga gin-install nga traffic light sa mga nagapangunang daeanon it Kalibo para maging organisado ro daeagan it mga naga-agi nga behikulo.
