KALIBO, Aklan—Bangud sa pagiging romantiko, gusto it mga taga-New Zealand nga i-selebrar ro adlaw it tagipusuon kada February 14 kadungan it pagsaueog kara sa bilog nga kalibutan.
Ginataw-an it importansiya ro selebrasyon bilang pagtau it pagkilaea kay Saint Valentine partikular ro anang pagiging martyr.
Suno kay Bombo International Correspondent Albert Rasco nga ro valentine’s day hay ginaselebrar it mga pamatan-on ag mga may edad eon sa New Zealand nga may daea nga kasadya ag kilig.
Sambilog raya sa mga festivals nga sikat sa bilog nga nasyon.
Kapareho raya nga ginaselebrar sa American style.
Ginpahayag dugang nga importante ro mga regalo para sa Valentine’s day sa New Zealand partikular ro mga alahas.
Ginakabig raya nga simbilo ag expressions it andang pagpalangga.
Mag-eowas sa alahas nga madahog, haeos mapuno man ro mga shops sa kalye it mga nagabaligya it flower bouquets sa adlaw it okasyon.
Kat owa pa sigon it COVID-19 pandemic, maabu nga mga gina-organisa nga mga concerts nga makadugang sa kasadya it okasyon.
Naga-offer man ro mga restaurants ag cafes it nagkaeain-eain nga gimik kun sa siin ro mga Kiwi restaurants hay nagatanyag it masarangan sa boesa nga package ag masyadong romantic nga ambiance.
May mga ginapatukar nga mild music sa sueod it restaurants.
Sa pihak nga parte, ro mga New Zealand Hoteliers hay naga-offer man it mga manami nga packages para sa lovers sa Valentine’s Day.
