KALIBO, Aklan—Ginpadumdum it Commission on Elections ukon Comelec-Aklan ro mga kandidato angot sa mga pag-instrikto nga ginapatuman para sa personal nga pagpangampanya mag-eowas sa iba pang polisiya kasunod it pag-arangkada it 90 diyas nga campaign period para sa national position.
Suno kay Crispin Raymund Gerardo, tagapaghambae it Comelec-Aklan nga ro kampanya makaron hay mabahoe ro kinaiba sa mga nagtaliwan nga campaign rules bangud kinahang-ean nga ro kada aktibidad hay aprubado it National Comelec Campaign Committee.
Tuyo it komite nga i-regulate ro kampanya sa eleksyon sa idaeom it new normal.
Sa idaeom it “no physical contact”, ro mga kandidato hay owa ginapasugtan nga magsueod sa mga baeay, magbeso-beso ukon maghakos sa publiko.
Maskin ro pakikipag-lamano ag selfie hay hugut nga ginabawaean.
Mag-eowas kara, owa man ginapasugtan ro pagtao it pagkaon, tubi ukon anumang bagay nga may balor kamana man ro pagtililipon ag pagdagsa it maabu nga tawo.
Dugang pa ni Gerardo nga ro sambilog pang bag-ong regulasyon nga ginapatuman hay para sa mga organizer it mga in-person campaign, pagpatigayun it mga rally, caravan ag iba pang campaign activities para makabuoe it permit halin sa Committee sa pamaagi it pag-aplay sa regional ukon provincial election offices kung siin pagahiwaton ro andang mga event.
