KALIBO, Aklan—Gin-umpisahan eon it embahada ag konsulado it Estados Unidos nga kontakon ro andang mga pumueuyu sa Ukraine para sa repatriation.
Raya ro ginpahayag ni Bombo International Correspondent Pinoy Gonzales it Texas, USA.
Suno kana nga ro hinyu ni US President Joe Biden sa anang mga kababayan sa Ukraine nga maghalin eon hay kasunod it nagataas nga tensyon sa tunga it nasambit nga nasyon ag kaiping nga Russia.
Naalarma sigon ro US bangud sa ibang sitwasyon makaron.
Nasayuran nga miyembro it North Atlantic Treaty Organization ukon NATO ro Amerika, kun sa siin gusto man nga maging miyembro it Ukraine nga hugut nga ginabaeabagan it Russia. Gusto sigon nga protektahan it amerika ro andang mga pumueuyu nga sa posibleng world war nga matabu engkaso nga magbaearilan ro Americans ag Russians.
Sa pihak nga parte, gindugang pa ni Gonzales nga kaeabanan nga nagaplano it mga pag-atake ro Russia makaron nga mga buean it pebrero nga bukon eon it masyadong maeamig.
Ginasugid nga nakapuwesto eon sigon ro ginatos kalibo nga tropa it Russia maeapit sa border it Ukraine.
