KALIBO, Aklan—Maabu eon nga mga pumueuyu ag negosyo sa Canada ro apektado sa ginapatigayon nga hubeag protesta it mga truck drivers sa parte it Ottawa ag Ambassador Bridge.
Raya ro ginpahayag ni Bombo International Correspondent Michelle Cabral, sangka truck driver sa nasambit nga nasyon.
Raya suno kana ro rason kon ham-an nga nagdeklara eon it state of emergency ro Ontario agud nga matapos eon ro kinagamo ag mag-uli eon ro mga nagapatigayon it truck protests.
Gindugang pa ni Cabral nga naga-ugyon imaw sa kawsa it anang mga kaibahan nga makaangkon it kahilwayan ukon freedom , apang kinahangean nga matapos eon ro protesta bangud nga apektado eon ro ekonomiya it nasyon.
Nasayuran nga naghubeag protesta ro Ottawa truckers kontra sa mandatory nga COVID-19 vaccination.
Nauna eon nga ginpahayag ni Premier Doug Ford, magiging iligal ro pagpatigayon it mga hubeag protesta, kun sa siin, ro sin-o man nga maga-eabag sa mandu hay magapangatubang sa pagkakulong ag multa it hasta sa $79,000 dollars.
Igapatuman man ro mandu sa sin-o man nga magabaeabag ukon makapa-atrasar sa paghueag it mga baeak-eon kaibahan eon ro biyahe it mga tawo paagto sa mga international border crossing.
Madumduman nga naga-abot eon sa tatlong domingo ro protesta it mga truckers kontra sa pag-obliga kanda nga magpabakuna kontra COVID-19 agud nga makasueod sa Ottawa.
