KALIBO, Aklan—Umarangkada eun ro ginapatigayon nga bakunahan kontra covid-19 sa probinsya it Aklan para sa mga naga edad 5 hasta 11 anyos.
Kaina nga agahon maabo ro mga ginikanan nga gin-ibahan pa ro andang mga unga agud nga magpila ag makabatun it bakuna kontra covid-19 sa temporaryong gintaeana karang vaccination site sa NVC gymnasium.
Suno sa ina nga si Jackelyn Valerrio, ginpili nana nga pabakunahan ro anang 8 anyos nga ungang eaeaki agud nga mas mataw-an it dugang nga proteksiyon kontra sa covid virus.
Mabahoe man sigon ro anang pagsalig sa gobyerno ag sa mga doktor rason nga nagapati imaw nga indi mapahamaka ro anang unga kung magbatun it bakuna. Nasayuran nga ro ginapasugtan eamang nga maiturok sa mga naga edad 5 hasta 11 anyos hay ro Pfizer vaccine kun sa siin may unang mas manaba nga dosage kung igakumpara sa bakuna nga ginaturok sa adult.
Sa pihak nga parte, owa man nagduda si Alyas Michelle nga pabakunahan it covid-19 vaccine ro anang unga nga naga edad it 6 anyos.
Apisar nga may hyperthyroidism sigon ro anang unga hay gusto nana rayang maturukan it bakuna agud nga maangkon it proteksiyon ag makasunod man sa mga pamanawon it andang pamilya.
