KALIBO, Aklan–Hugut nga ginakondena it Bagong Alyansang Makabayan ukon Bayan-Aklan ro ginahimo nga tikang it gobyerno angot sa importasyon para mapun-an ro kakueangan sa pilang lokal nga produkto sa nasyon.
Raya hay kasunod it plano it gobyerno nga mag-import it asukal sa ibang nasyon mag-eowas pa sa bugas ag galunggong.
Suno kay Mr. Kim Sin Tugna, OIC Coordinator it Bayan-Aklan nga nagapamatuod eamang raya it bulok nga sistema it administrasyong Duterte.
Sa baylo sigon nga buligan ro mga lokal nga mangunguma nga mapaumwad ro andang produksyon hay mas ginapili it gobyerno nga mag-angkat sa kaeapit nga mga nasyon.
Gintaw-an pa it punto ni Tugna nga bugana sa lokal nga produkto ro Pilipinas bangud sambilog raya sa mga agricultural country apang owa nataw-an it importansya.
Nagapati man ro grupo nga ro padayun nga importasyon ro maga-patay sa pangabuhian it mga maisot nga negosyante ag mangunguma bangud sa kawad-an it kita bangud sa mas barato nga presyo it mga imported nga produkto.
