KALIBO, Aklan—Mas pang ginpabaskog it ginbilog nga African Swine Fever Task Force ro andang pagbantay sa mga ginplastar nga checkpoint sa kada border it probinsiya agud nga mapabilin nga ASF free ro Aklan.
Suno kay Dr. Joseph Lachica it Office of the Provincial Veterinarian ukon OPVET-Aklan nga mas hugut ro pag-inspection nanda kaibahan ro mga tawuhan it Bureau of Animal Industry sa mga kargamento nga ginasakay sa mga pampasaherong bus, van, trucking ag iba pa rason nga padayun nga nakakakumpiska it mga meat products nga kaeabanan hay naga-agi eamang sa probinsiya.
Tanan sigon nga mga nakumpiska nga mga pork products nga owa it nagakaigo nga permit ukon dokumento hay gina-dispose ukon ginasunog.
Dugang pa ni Dr. Lachica nga ap-at nga rehiyon eon lang sa bilog nga nasyon kaibahan ro region 6 ro owa it may nailistang kaso it ASF.
Hasta suno kana sa lebel it munisipyo hay hugut man nga ginapatuman ro mga programa agud nga matapna ro ASF sa mga kabarangayan.
