KALIBO, Aklan—Haeos 60 hasta 70 porsyento eon ro natapos sa konstruksyon it ginapatindog nga bag-ong retaining wall sa palibot it municipal dumping site sa Brgy. San Isidro, Banga.
Suno kay Engr. Hermie Seraspi it Municipal Engineering Office, ginaeauman nga matapos eon ro proyekto sa masunod nga tatlong dominggo.
Mabahoe sigon nga bulig kanda ro manami nga tyempo para mapadasig ro andang pag-ubra.
Ginpabugae pa ni Engr. Seraspi nga mas matibay ro andang gina-ubra nga retaining wall makaron kumpara sa dati.
Raya hay bangud maabu nga poste ro andang ginbutang ag mas madamoe ro buhos.
Ginpahayag dugang nga naghimo eon sanda it pamaagi agud nga ma-divert ro tubi eabi eon kun naga-uean para masiguro nga indi raya magdiretso sa dumping site.
Padayun man sigon ro andang pag-usoy it pondo para sa total rehabilitation.
Nasayuran nga naga-abot sa P1.1 million ro gintaeana nga pondo it taeatapan para sa natungdan nga proyekto.
Madumduman nga nagtuga it mabahoe nga perwisyo sa mga residente ag mangunguma sa pilang kaeapit nga barangay ro pagkasamad it pader it dumping site kung siin nagkalhit ro sangkaterbang basura sa mga kasubaan ag kaeanasan.
