KALIBO, Aklan—Padayun ro pagtinaas it kaso it Coronavirus Disease 2019 ukon COVID-19 sa Hong Kong matapos ro selebrasyon it Chinese New Year.
Suno kay Bombo International Correspondent Jackie Torate, tumandok it banwa it Makato apang presenteng nagatrabaho sa Hong Kong nga naga-abot sa masobra 6,000 ka mga kaso ro andang nailista kada adlaw sa nagtaliwan nga daywang dominggo ag ginaeauman nga sumaka pa sa 7,000.
Mag-eowas sa maeapnagon nga selebrasyon it Chinese New Year, posibleng nakaapekto man sa pag-abu it kaso ro gulpiyadang pag-naba it temperatura.
Kaeabanan sigon sa mga bag-ong nagpositibo hay mga senior citizen kung siin haeos 20 porsyento pa eang it populasyon mga raya ro nabakunahan.
Bangud kara, nagpatuman eon ro gobyerno it mas strikto nga polisiya.
Umpisa ko nagtaliwan nga dominggo, ginlimitahan eamang sa daywang katawo ro gathering ag kinahang-ean ro sang metro ag tunga nga distansya.
Sa makaron, punuan eon ro mga ospital, quarantine facility ag hotel sa Hong Kong samtang ro simbahan hay nagapabilin nga sarado.
Ginpahayag pa ni Torate nga ginlaygayan sanda nga magtinir anay sa baeay eabi eon kun owa man it importanteng transaksyon sa guwa.
Naga-abot sigon sa 17 ka mga Overseas Filipino Worker (OFW) ro ginpasakaan it multa matapos nga mag-eabag sa physical distancing.
Ro multa hay naga-abot sa P5,000 Hong Kong dollar ag posibleng madoble pa.
Sa Marso, nakataeana nga magpatigayun it mandatory mass testing ro gobyerno para sa mga pumueoyo.
